И еще сказуется погибель, разорение же и вконец разрушение града Рима ветхаго, под именем Вавилона, сиречь падение и опустение Вавилона значит опустение стараго Рима. Последование сицево есть, сказует тайновидец Иоанн Богослов во Откровении своем о Вавилоне, описует же того во образе жены любодейцы, глаголя: «И прииде един от седми ангел имущих седмь фиал, и беседоваше со мною, глаголяй ми: гряди семо, покажу ти осуждение великия блудницы, седящия на водах многих, с нею же соблудиша царие земстии, и упишася живущии на земли от вина блуда ея. И отведе мя в Дусе в пустыню, и видех жену седящую на звери червлением, полнем имен хульных, имущем глав седмь и рогов десять. И жена, юже видел еси, есть град великий, иже имать царство над царьми земными. И жена бе облечена в порфиру и червлень, и позлащенна златом и драгим камением и бисерами, имущая чашу златую в руце своей, полную мерзостей и нечистоты блужения своего, и на челе ея имя написанное тайна: Вавилон великий мати блудников и блудниц и мерзостей земских» (Апокалипсис, гл 17).
На сия словеса о Вавилоне различна имеются разумения и сказания, суть же сия: Вавилоном убо нарицается самый истый той град Вавилон персский, в нем же многи быша муки. Ибо во оном царствоваху первый в мире мучитель царь Неврод, по сказанию Библии: Навуходоносор, Атиох, иже бяху негли проображением антихристу, от тех стран хотящу изыти, якоже сказует святый Андрей во Апокалипсисе во главе 9 и 16. Паки Вавилоном нарицается и весь мир сей, и всего мира смешение, и житейское смущение, или мятеж. Всюду бо суть греси различнии, и святых крови пролияны быша.
И еще Вавилоном непщуется греческий Царьград, или Константинополь, иже зрится стоящ при водах на седми холмах: темже и называется гречески Епталофос, сиречь седмихолмие. И отсюду неким возмнеся, аки бы о сем граде рекл есть ангел Богослову: «Прииди да покажу ти суд любодейцы великия, седящия на водах многих». И паки: «Седмь глав, горы суть седмь, ид еже жена седит на них».
Еще же под именем Вавилона наивернейши разумеется ветхий Рим, иже есть в земли италийстей, стоящий на седми горах, при водах многих, сиречь при мори, или яко обладающий многими народы. «Воды бо, рече, людие и народы суть, племена и языцы, идеже любодейца седит». И паки: «И жена, юже виде, град великий есть, иже имать царство над царьми земными» (Апокалипсис, гл. 17). Зде яве извещавается ветхий Рим быти Вавилоном, кий бо ин таков град, иже бы имел такову власть над цари многими, якоже старый Рим, иже беяше властелин всея вселенныя, по свидетельству святаго Евангелия: «Изыде, рече, повеление от кесаря августа, написати всю вселенную» (Лк., 2, 1). И паки Апокалипсис глаголет: «И седмь глав, седмь горы суть, идеже жена седит на них». И паки: «Видех жену пияну кровьми святых, и кровьми свидетелей Исусовых».
Сия апокалипсическая словеса весьма приличествуют ветхому Риму, стоящему на седми горах, при водах многих, обладающему многими народы, в нем же и кровь святых пролияся, якоже верховных апостол, тако и прочих безчисленно святых мученик. Ибо римстии кесари, наченше от времен святых апостол чрез триста лет, не точию в Риме, но и во всей вселенней гониша Церковь Божию, и зельно оскорбляху христиан, и многи крови проливаху. Видиши ли, каков есть Рим со своими кесарьми? И влепоту речеся о нем, яко пияну ему кровьми святых и кровьми свидетелей Исусовых. Темже явственно есть, яко под именем Вавилона разумеется старый Рим, егоже нарицает Вавилоном достоверный свидетель святый апостол Петр в соборном своем послании, глаголя: «Целует вы Церковь, яже в Вавилоне соизбранная и Марко сын мой» (1 Петр., 5, 6). На сей стих святии отцы толкование творяще сказуют, сие рещи Петру апостолу о старом Риме (Апостол толковый, л. 179). И святый Андрей в толковании Апокалипсиса глаголет: «От деяний и сбытая налагаются имена на грады». Ниже: «И старый же Рим Вавилон в послании Петрове нарицается». В предисловии книги о Святом Дусе восточнаго учителя Дидима (егоже толкования в Толковом Апостоле обретаются) писано сице: «Егда бех рече в Вавилоне, сиречь в Риме, и порфироносныя блудницы обретахся житель».
